رامي صبري يرد على منتقدي استمراره في الغناء: فلسطين بتتضرب من قبل ما نيجي الدنيا

علق الفنان رامي صبري على انتقادات بعض الجمهور للفنانين الذين يواصلون تصوير وتسجيل أعمالهم الفنية، في ظل الظروف التي تمر بها فلسطين وما يتعرض له الشعب الفلسطيني من إبادة.

وقال رامي صبري خلال بث مباشر له عبر حسابه على موقع «إنستجرام»: «الكومنتات اللي بتقول أنت بتغني إزاي وفلسطين بتتضرب، يعني إحنا مش هنفضل قاعدين بناكل وبنشرب وبننام، فهي بس الناس اللي بتكتب الكومنتات دي مش فاهم بتكتبها على أساس إيه؟، ده شغلنا ودي عقود كاتبنها، ومنقدرش إننا منشتغلهاش».

وتابع رامي صبري خلال البث المباشر: «مش ببقى فاهم أوي الناس اللي مش عايزانا نغني ونشتغل، وبزعل لما بلاقي الناس بتفكر كدة لكن معنديش حاجة أعملها، فلسطين على فكرة بتتضرب من قبل ما إحنا نيجي الدنيا، وإحنا هنعمل إيه، بنعمل اللي علينا وممكن مثلا نغني لفلسطين وندفع فلوس وكل حاجة عشان نتضامن، لكن نوقف شغلنا؟».

وأضاف رامي صبري: «طب أنت لما بتوقف شغلك مش بتتفرج على الماتشات اللي شغالة مثلا؟ مش بتروح الاستاد وتدفع فلوس عشان تروح تتفرج على فريقك وهو بيلعب؟ مش بتصحى تاكل في بيتك؟ لا بتخرج وبتعيش حياتك، طب بتخرج ليه مدام فلسطين بتتضرب وبتموت، نموت إحنا كمان طيب؟».

واستكمل رامي صبري حديثه قائلا: «بكبر دماغي، والناس اللي بتقول بتشتغل ليه يا فنان وفلسطين بتموت، ما فلسطين طول عمرها بتموت، مش فلسطين بس لا كل البلاد زي البوسنة، فنموت إحنا كمان عشان نبقى كويسين من وجهة نظركوا؟ مش هو ده التضامن، ما أنا ممكن أعمل حفلة وأتبرع بيها لفلسطين».

واختتم رامي صبري: «إحنا آه شغلانتنا مختلفة عشان فيها فرح وسعادة بس ده شغلنا، مش هينفع نوقفه واللي بيفكر كدة ده غلط، لأننا بنعول أُسر وعندنا حياة مينفعش نوقف عشان فلسطين بتموت، بس مش لازم إحنا كمان نموت يعني، وتحيا فلسطين وإن شاء الله الفترة الجاية تبقى أحسن».